Жүктіліктің 32-аптасы

Әйелдің жағдайы

Жүкті әйел ішінің төменгі жағының біршама ауырлуын сезуі мүмкін. Бұл жөнінде дәрігерге міндетті түрде хабарлау қажет. Ол сізді тексеріп, бала басының босану жолында қалай орналасқанын анықтайды. Басының әлі де төмен түсетіні, ал жамбасқа түсетін қысымның күшейетіні әбден мүмкін. 
Әйелдің жатыры қатты ұлғайды, сондықтан қазір бала біткенге дейінгі көлемінен 500 есе үлкен. Жатыр тәулігіне бірнеше рет сезілетіндей жиырыла бастауы мүмкін. Бұған алаңдайтын еш себеп жоқ: бұл жатырдың алдағы босануға дайындалған жай ғана «жаттығуы». Су кеткенін немесе қан бөліндісін байқасаңыз ғана жедел жәрдемді шақырту қажет.

Құрсақтағы баланың сырт келбеті

Сәбиіңіздің бойы өсіп келеді. Ол белсенді салмақ қосып жатқандықтан, жүкті әйелдің дене салмағы ұлғаяды. Барлық қоректік заттар ана ағзасынан плацента арқылы сәбиге барады. 
Осы кезеңде ұрық гипотрофиясы дамуы мүмкін. Бұл процесс плацетаның мерзімінен бұрын тозуы, тамырлар жұмысының бұзылуы немесе кальций тұздарының жиналуы салдарынан туындайды. Бұл сәбидің қоректік заттар мен оттектің жеткілікті мөлшерін алмауына алып келеді, өсуі мен дамуы баяулайды және ішкі мүшелердің жұмысы бұзылады.
Сәбиіңіздің бойы қырық сантиметрге жетеді, ал салмағы шамамен екі килограмды құрайды. Жүктіліктің 32-аптасындағы балалардың терісі ашық қызғылт түсті болады, яғни алғашқы түктері кетіп, ал алғашқы майы дене қатпарларында ғана қалады. Нәрестенің басындағы шаш қараяды, бірақ әлі де жұмсақ және әлсіз болады.
Бұл кезеңде гипофиздің, қалқанша бездің, бүйрек бездерінің және басқа да ішкі секреция бездерінің дамуы жетіле түседі. Осы мүшелердің барлығы сәби гормондарын шығаруға және барлық мүшелері мен жүйелерінің жұмысын реттеуге қатысады. 
Ұрық вазопрессин мен окситоцинді белсенді шығара бастайды, олар кейін босану кезінде және сәбиді емізгенде көмектеседі.

УДЗ жасау

Егер әйел емханада есепке уақтылы тұрса, онда дәл осы 32-аптада соңғы жоспарлы УДЗ-ны жасайды. Бұл диагностиканың өте маңызды кезеңі, ол сәбидің жалпы жағдайын, мүшелерінің даму дәрежесін және жүктіліктің жалпы барысын бағалауға мүмкіндік береді. 
Алдыңғы зерттеулердегідей, дәрігер сәбидің денесін өлшейді және деректерді жүктіліктің мерзімімен салыстырады. Алайда, осы мерзімде УДЗ-ның маңызды сәті нәрестенің қалай орналасқанын анықтау болып табылады. Егер ол басымен төмен орналасқан болса, анасының еш уайымсыз жүре беруіне болады, өйткені бұл босану алдындағы нәрестенің қалыпты орналасуы. Егер ұрық басқаша орналасса, дәрігер сәбидің босануға ыңғайлы орналасуына көмектесетін бірқатар жаттығу жасауға кеңес береді. 
Соңғы жоспарлы УДЗ-да дәрігер дүниеге келгеннен кейін нәрестенің бойы мен салмағының қандай болатына болжам жасай алады. Дәл осы мәліметтер босану түрін анықтауда шешуші мәнге ие болады. Мысалы, егер баланың салмағы нормадан айтарлықтай асатын болса, жүкті әйелге ананың денсаулығына зиян келтірмес үшін кесар тілігін жасауды ұсынуы мүмкін. 
УДЗ жасаудың маңызды кезеңдерінің бірі плацентаның жағдайын бағалау болып табылады. Осы мүшенің тозу белгілері бар-жоғын УДЗ-ның көмегімен ғана анықтауға болады, өйткені бұл процесс сәбидің жатырішілік дамуының бұзылуына алып келуі мүмкін. Қуанышқа орай, анықталған дисфункцияны немесе плацентаның тозуын арнайы дәрі-дәрмектермен уақтылы жоюға болады, сонда балаға қауіп төнбейді.

 

Аналарға арналған мүмкіндіктер

Балаңыздың дүниеге келуіне дейінгі 40 апта сізді таң қалдыратын барлық қызықты, физикалық өзгерістерге және үлкен күн жақындаған сайын өсетін күту сезіміне толы.

EmptyView